Закон РБ 110-З 04.01.2014 Аб ратыфікацыі Дагавора аб дружалюбных адносінах і супрацоўніцтве паміж Рэспублікай Беларусь і Лаоскай Народна-Дэмакратычнай Рэспублікай

ЗАКОН РЭСПУБЛІКІ БЕЛАРУСЬ студзеня 2014 г. № 110-З

Аб ратыфікацыі Дагавора аб дружалюбных адносінах і супрацоўніцтве паміж Рэспублікай Беларусь і Лаоскай Народна-Дэмакратычнай Рэспублікай Прыняты Палатай прадстаўнікоў 5 снежня 2013 года Адобраны Саветам Рэспублікі 19 снежня 2013 года



Ратыфікаваць Дагавор аб дружалюбных адносінах і супрацоўніцтве паміж Рэспублікай Беларусь і Лаоскай Народна-Дэмакратычнай Рэспублікай, падпісаны ў г. Мінску 1 ліпеня 2013 года.

Прэзiдэнт Рэспублiкi Беларусь А.Лукашэнка





ДАГАВОР

АБ ДРУЖАЛЮБНЫХ АДНОСІНАХ I СУПРАЦОЎНІЦТВЕ ПАМІЖ

РЭСПУБЛІКАЙ БЕЛАРУСЬ I ЛАОСКАЙ НАРОДНА-ДЭМАКРАТЫЧНАЙ

РЭСПУБЛІКАЙ



Рэспубліка Беларусь і Лаоская Народна-Дэмакратычная Рэспубліка, якія далей называюцца Дагаворнымі Бакамі,

абапіраючыся на традыцыі дружалюбных адносін шміж народамі дзвюх краін,

пацвярджаючы прыхільнасць мэтам і прынцыпам Статута Арганізацыі Аб’яднаных Нацый,

перакананыя ў тым, што развіццё раўнапраўнага і ўзаемавыгаднага супрацоўніцтва паміж Рэспублікай Беларусь і Лаоскай Народна-Дэмакратычнай Рэспублікай адпавядае інтарэсам іх народаў,

жадаючы надаць якасна новы ўзровень двухбаковым адносінам і ўмацаваць іх прававую базу,

дамовіліся аб ніжэйпададзеным:



Артыкул 1



Дагаворныя Бакі развіваюць свае адносіны як дружалюбныя дзяржавы і кіруюцца прынцыпамі ўзаемнай павагі, незалежнасці, дзяржаўнага суверэнітэту, тэрытарыяльнай цэласнасці, раўнапраўя і неўмяшання ва ўнутраныя справы, непрымянення сілы або пагрозы сілай, мірнага ўрэгулявання спрэчак і добрасумленнага выканання міжнародных абавязацельстваў.



Артыкул 2



Дагаворныя Бакі развіваюць раўнапраўнае i ўзаемавыгаднае супрацоўніцтва ў палітычнай, эканамічнай, навукова-тэхнічнай, сацыяльнай, культурнай, гуманітарнай і іншых галінах.



Артыкул 3



Дагаворныя Бакі будуць садзейнічаць развіццю сувязей і кантактаў паміж парламентамі і іншымі органамі ўлады дзвюх краін. Артыкул 4



Дагаворныя Бакі будуць рэгулярна праводзіць абмен думкамі на розных узроўнях па пытаннях развіцця і паглыблення двухбаковых адносін, якія ўяўляюць узаемны інтарэс.



Артыкул 5



Дагаворныя Бакі будуць спрыяць пашырэнню прамых сувязей і супрацоўніцтва на ўзроўні адміністрацыйных адзінак у межах іх кампетэнцыі.

Дагаворныя Бакі будуць садзейнічаць развіццю кантактаў паміж іх грамадзянамі і грамадскімі арганізацыямі.



Артыкул 6



Дагаворныя Бакі будуць развіваць супрацоўніцтва ў рамках Арганізацыі Аб’яднаных Нацый і іншых міжнародных арганізацый, у тым ліку рэгіянальных, у інтарэсах умацавання міру і бяспекі, вырашэння эканамічных, экалагічных і іншых актуальных міжнародных праблем.



Артыкул 7



Дагаворныя Бакі ў адпаведнасці з нацыянальным заканадаўствам і зыходзячы з сваіх міжнародных абавязацельстваў будуць стымуляваць і абараняць узаемныя інвестыцыі, развіваць гандаль і ствараць сумесныя арганізацыі, у тым ліку з удзелам партнёраў з трэціх краін.



Артыкул 8



Кожны з Дагаворных Бакоў узаемна прадастаўляе другому Дагаворнаму Боку рэжым найбольшага спрыяння ў галіне гандлёва-эканамічнага супрацоўніцтва і спрыяе адкрыццю і дзейнасці на сваёй тэрыторыі прадстаўніцтваў знешнегандлёвых арганізацый другога Дагаворнага Боку.



Артыкул 9



Кожны з Дагаворных Бакоў садзейнічае транзіту праз сваю тэрыторыю транспартных сродкаў, пасажыраў і грузаў другога Дагаворнага Боку.



Артыкул 10



Дагаворныя Бакі развіваюць супрацоўніцтва ў мэтах паляпшэння ўзаемадзеяння ў выпадку ўзнікнення надзвычайных сітуацый прыроднага і тэхнагеннага характару, прыродных катастроф і мінімізацыі іх наступстваў.



Артыкул 11



Дагаворныя Бакі супрацоўнічаюць у барацьбе з арганізаванай злачыннасцю, тэрарызмам, незаконнымі актамі, накіраванымі супраць бяспекі грамадзянскай авіяцыі, незаконным абаротам наркатычных сродкаў і псіхатропных рэчываў, зброі, кантрабанды, уключаючы незаконныя перамяшчэнні праз граніцу твораў мастацтва і прадметаў, якія ўяўляюць культурную і гістарычную каштоўнасць, а таксама ствараюць умовы для аказання ўзаемнай прававой дапамогі па грамадзянскіх, сямейных і крымінальных справах. Артыкул 12



Па пытаннях, закранутых у гэтым Дагаворы, а таксама па іншых пытаннях, што ўяўляюць узаемны інтарэс, Дагаворныя Бакі і іх кампетэнтныя органы заключаць адпаведныя пагадненні.



Артыкул 13



Кожны з Дагаворных Бакоў абавязваецца не ўдзельнічаць у якім-небудзь саюзе, накіраваным супраць другога Дагаворнага Боку, і не дапусціць выкарыстання якім- небудзь трэцім бокам сваёй тэрыторыі для ажыццяўлення варожай дзейнасці супраць другога Дагаворнага Боку.



Артыкул 14



Гэты Дагавор не закранае правоў і абавязацельстваў Дагаворных Бакоў, якія вынікаюць з іншых міжнародных дагавораў, удзельнікамі якіх яны з’яўляюцца.



Артыкул 15



Спрэчкі адносна тлумачэння і прымянення палажэнняў гэтага Дагавора падлягаюць вырашэнню шляхам кансультацый і перагавораў паміж Дагаворнымі Бакамі.



Артыкул 16



У гэты Дагавор могуць быць унесены змяненні і дапаўненні па згодзе Дагаворных Бакоў.



Артыкул 17



Гэты Дагавор падлягае ратыфікацыі і ўступае ў сілу ў дзень абмену ратыфікацыйнымі граматамі.



Артыкул 18



Гэты Дагавор заключаецца тэрмінам на дзесяць гадоў. Яго дзеянне будзе аўтаматычна працягвацца на наступныя пяцігадовыя тэрміны, калі ні адзін з Дагаворных Бакоў шляхам пісьмовага паведамлення не заявіць аб сваім жаданні дэнансаваць яго, але не пазней чым за шэсць месяцаў да сканчэння адпаведнага тэрміну яго дзеяння.

Гэты дагавор будзе зарэгістраваны ў Сакратарыяце Арганізацыі Аб’яднаных Нацый у адпаведнасці з Артыкулам 102 яе Статута.



Здзейснена ў горадзе Мінску 1 ліпеня 2013 года ў двух экзэмплярах, кожны на беларускай, рускай, лаоскай і англійскай мовах, прычым усе тэксты маюць аднолькавую сілу. У выпадку ўзнікнення рознагалоссяў у тлумачэнні палажэнняў гэтага Дагавора перавагу мае тэкст на англійскай мове.

За Республіку Беларусь За Лаоскую Народна-

Подпіс Дэмакратычную Рэспубліку

Подпіс